༧རྒྱལ་བའི་སྐུ་ཡི་འཁྲུངས་སྐར།
གནམ་ལ་ཉི་ཟླ་གཉིས། ས་ལ་༧རྒྱལ་བ་པཎ་ཆན་ཟེར་བ་བཞིན། འདི་ལོའི་ཕྱི་ཟླ་༧པའི་ཕྱི་ཚེས་༦ཏེ་༧རྒྱལ་བའི་སྐུ་ཡི་འཁྲུངས་སྐར་ཉིན་འཛམ་གླིང་སྤྱི་དང་ལྷག་པར་འདི་ག་རང་རེའི་སློབ་གྲྭའི་ནང་ཞོགས་པ་སྔ་མོར་༧གོོང་ས་སྐྱབས་མགོན་ཆེན་པོ་སྐུ་ཚེ་ཁྲི་ལོར་བརྟན་པའི་བསངས་གསོལ་རླུང་རྟ་འཐེན་པ་དང་། ཕྱག་ཚོད་༩ པའི་ཐོག་སློབ་གྲྭའི་བློ་གཏེར་ཚོགས་ཁང་ནང་དངོས་གཞིའི་མཛད་སྒོར་དགེ་སློབ་མཉམ་འཛོམས་ངང་། ༧རྒྱལ་བའི་ཞབས་བརྟན་འུར་འདོན་གནང་ཞོར་༧རྒྱལ་བའི་སྐུ་པར་མཐོང་གྲོལ་རིན་པོ་ཆེར་དགེ་སློབ་ཡོངས་ནས་དཀར་གཙང་གི་མཇལ་དར་སྒྲོན་པ་དང་། དེ་རྗེས་སློབ་གྲྭའི་སློབ་སྤྱི་མཆོག་ནས་གོང་ས་༧སྐྱབས་མགོན་རིན་པོ་ཆེ་མཆོག་གི་ཐུགས་ཀྱི་དགོངས་གཞི་དང་། བོད་མིིའི་གནས་བབ། ལྷག་པར་ཁོང་གི་ཞི་བདེ་དང་བྱམས་བརྩེའི་ལམ་སྟོན་ལ་བརྟེན་ནས། འཛམ་གླིང་སྐྱེ་འགྲོ་ཡོངས་ཡིད་དབང་འཕྲོག་ཅིང་། དུས་རབས་ཉེར་གཅིག་པའི་སྟོན་པ་ཆེན་པོར་གྲགས་པའི་སྐུ་ཚེའི་འབྱུང་བ་བརྗོད་པ་དང་། དེ་ནས་ཉིན་རྒྱབ་ལས་སློབ་མཉམ་འདུས་ཀྱིས་སྐུ་ཉིད་དགུང་ལོ་༡༡༣ ལྷག་གནས་ཐུབ་དགོངས་གཞི་ཡོད་པ་བཞིན། སློབ་གྲྭའི་ཁོར་ཡུག་ནང་རྩི་ཤིང་མི་འདྲ་བ་༡༡༣ འདེབས་འཛུགས་བྱས་ཡོད་པ་ཡིན། དེ་ནི་དགེ་སློབ་ཀུན་གྱིས་ཁོང་ལ་བཅངས་པའི་བརྩེ་སེམས་དང་། བསྔགས་པའི་སེམས་མཚོན་པ་ཡིན།
